मिडियामाथि हमला प्रजातन्त्र मास्ने षडयन्त्र
मिडिया हाउसहरूमाथि विध्वंसकारी एवं निन्दनीय आक्रमणको र्सवत्र निन्दा
छानबिन समिति गठन

इराकमा भदौ १६ गते १२ जना नेपालीहरू वर्वरतापूर्वक मारिएको विरोधमा काठमाडौँमा निस्केको जुलुसले विदेशमा रोजगारी दिलाउने एक सयभन्दा धेरै कम्पनीका कार्यालय, केही धार्मिक स्थल र व्यक्तिहरूको सम्पत्तिका साथै कान्तिपुर पब्लिकेसन र कान्तिपुर टेलिभिजन तथा स्पेसटाइम प्रकाशन र च्यानल नेपालमाथि आक्रमण गरी करोडौँको क्षति पुर्याएको घटनाको सरकार, राजनीतिक दलहरू, नेपाल पत्रकार महासंघ तथा पत्रकारहरूका विभिन्न संघसंस्थाहरू, मिडियासँग सरोकार राख्ने संस्थाहरू, राष्ट्रिय मानवअधिकार आयोग तथा मानवअधिकारका लागि कार्यरत संघसंस्थाहरू एवं विभिन्न धार्मिक तथा पेशागत संघसंस्थाहरूले घोर निन्दा र भर्त्सना गरेका छन् ।

कतिपय राजनीतिक दलका नेताहरू तथा मानवअधिकारवादीहरूले मिडियामाथिको हमलालाई प्रजातन्त्रमाथिकै हमला र प्रजातन्त्र मास्ने षडन्त्र हो भन्नु भएको छ ।

कान्तिपुरका प्रवन्ध निर्दशक कैलाश सिरोहियाले सरकारको गैरजिम्मेवारपूर्ण बेवास्तालाई कान्तिपुरले अर्थपूर्ण रूपमा लिएको बताउनु भएको छ । उहाँले स्वदेशी पुँजी र परिश्रमले सिंचित संचार संस्थामाथिको आक्रमणबाट कान्तिपुर किंचित विचलित नहुने उल्लेख गर्दै स्वतन्त्र पत्रकारितामार्फ देश र जनताको सेवामा कमी आउन नदिने बताउनु भएको छ ।
विभिन्न सुरक्षा निकाय तथा उच्च पदस्थ सुरक्षा अधिकारीलाई समेत टेलिफोन सर्म्पर्क गरी गुहार माग्दा पनि दुई घण्टापछि सुरक्षाकर्मीहरू आइपुग्नुले घटना नियोजित भएको भान दिएको स्पेसटाइमले जनाएको छ ।

उक्त हमलाको फलस्वरूप स्पेसटाइम नेर्टवर्कको केबुल र्सर्भिस र च्यानल नेपालको प्रसारण झण्डै २४ घण्टा अवरुद्ध भएको थियो । स्पेसटाइम दैनिक पत्रिका केही दिन स्थगित भएको छ ।

प्रधानमन्त्री शेरबाहादुर देउवाले संचार माध्यमहरूमाथि आक्रमणको छानबिन गरिने बताउनु भएको छ । सरकारले काठमाडौँ उपत्यका लगायत अधिराज्यका विभिन्न ठाउँमा बुधबार भएको विध्वंस र तोडफोडको छानबिन गरी दोषीलाई कारबाहीको सिफारिस गर्न सर्वोच्च अदालतका पर्ूवन्यायाधीशको अध्यक्षतामा छ सदस्यीय उच्चस्तरीय छानबिन समिति गठन गरेको छ ।

राष्टिय अस्मितामाथि हमला

(कान्तिपुर दैनिकमा भदौ १७ गते मुखपृष्ठमा प्रकाशित विशेष सम्पादकीयको केही अंश)
देशको अग्रणी व्यावसायिक संचार संस्था कान्तिपुर पब्लिकेसन्स र कान्तिपुर टेलिभिजनमाथि भएको विवेक शून्य आक्रमणले नेपाली सभ्यता र स्वतन्त्र सूचना समाजप्रति घोर उपेक्षा प्रकट गरेको छ । बाह्र वर्षलामो स्वतन्त्र पत्रकारिता यात्रामा कान्तिपुरले बुधबार सबैभन्दा कठोर प्रहार सामना गरेको छ जसबाट आमसंचार क्षेत्र मर्माहत त भएको छ नै, यसले देशमा सरकारविहीनताको पनि प्रष्ट सन्देश दिएको छ ।

.......राष्ट्रकै एक संचार धरोहरमाथि भएको आत्रमणमा कुनै अज्ञात समूहको प्रायोजन देखिनु डरलाग्दो छ । कुनै कारणबिना संचार माध्यममाथिको यो अप्रत्याशित र अकल्पनीय हमला अत्यन्त निन्दनीय छ । पूणैतः नेपाली लगानीमा देशको स्वतन्त्र पत्रकारिताको विकासमा समर्पित यस संचार माध्यममाथिको आक्रमणले राष्टिय अस्मितामै धावा बोलेको हामीले ठानेका छौँ ।

.....राजधानीमा बिहानै देखि सुरु भएको प्रदर्शनका सिलसिलामा तीनकुनेस्थित कान्तिपुर परिसरबाहिर सडकमा रहेका प्रदर्शनकारीमध्ये कुनै निहित स्वार्थ भएको समूहले एक्कासी गरेको आक्रमण स्वतन्त्र राष्टिय संचार माध्यमप्रति नियोजित षडयन्त्रमूलक कारबाही हो ।

..... यो हमलाविरुद्ध लाखौँ पाठक र शुभचिन्तकको साथ नै आफ्नो राष्टिय दायित्वप्रति हामीलाई यथावत र अझ सक्रिय हुने प्रेरणा हुनेछ । राष्टिय अस्मिता र प्रजातन्त्रको धुकधुकीका रूपमा रहेको स्वतन्त्र संचारप्रति हुने यस्ता कुनै पनि आक्रमणबाट हामी अविचलित रहने प्रण पनि गर्न चाहन्छ ।